Od Tirania Terzcev iz Cirkve.
Da Hiſa moja, Hiſa Molitve je. Luk. 19.
Kad bi bil Kristush Jeſush na Cvetnicu pribliſavalse k' Jeruzalemu Varashu, nad njim seje zplakal, i rekelje, dabi ti znal Varash kajse hoche z' tobum dogoditi, drugach bi mislil, ar hochesh od Nepriatelov porushen biti tako, date nebude mochi poznati, dasi Varash bil, kajti nechesh zpoznati Pohadjanje Zvelichitela tvojega. Potlamje vlezel vu Civkvu, i ondeje nashel kupujuche, i prodajuche, kojem Ztole je prevernul, z' Bichem zmlatil, i van iztiral govorechi. ,, Cirkva je Hiſa Boſja, i Hiſa Molitve. ,, viste pako nju vchinili Tolvajzku Zkrivalnicu.
Razdelenje.
Tiranje Terzcev iz Cirkve Jerozolimitanzke po Kristushu Jeſushu vchinjeno nazvescha nam, kak osebujno Poshtenje Cirkvi datise, i kak vu njoj derſatise mora, ar Cirkvaje1. Hiſa Boſja, ar vu njoj G. Bog osebujno prebiva.
2. Hiſa Molitve, ar vu njoj osebito molitise mora.
Navuk.
Kakgoder negda Kristush Jeſush prodajuche, i kupujuche, vzemshi Bich; najpervlje Ztole njihove prevernulje, iz Cirkve van je ztiral govorechi: Cirkva je Hiſa Boſja, i Hiſa Molitve. viste nju vchinili Tolvajzku Zkrivalnicu, i Mezto Terguvanja. —— Tako izto, i Den deneshni Redovnikom, kakti Boſjem Nameztnikom od Kristusha Jeſusha danaje Oblazt vse one, kojise vu Cirkvi nedoztojno derſe najmre, koji vu Cirkvi pod Sluſbum Boſjum shepcheju, zpominjajuse, ogledavaju, zpavaju, ali druge prechiju, i zpachuju, opomenuti, i pokarati obchinzkem Nachinom, i ako za Opomenjek nebi marili, takaj po Cirkvenom Sluge iz Cirkve van iztirati. — kak takaj, i oni, koji vu Cirkvi z' raztreshenum Pametjum, i nechiztem Mishlenjem zaderſavajuse, z' Boſanzkem Bichem iz Cirkve gonijuse, kajti Cirkva je Hiſa Boſja, ar Bog vu njoj osebujno prebiva vu Oltarzkom Shakramentu z' Telom, i Dushum pod Prilikum Kruha, i Vina. — Je takaj Hiſa Molitve, kajti akoprem Bog vu vſakom Meztu molitise mora, vendar Cirkva osebito za ovo odredjenaje, dase Ljudztvo z' vekshem Brojem vu nju zpravi, i ondese z' jedinjenem Serdcem, i Glasom Bog moli, da nam Bog nashe Grehe oprozti, i kaj namje potrebno na ſivljenje duhovno, i telovno, podeli.(Josef Gyurkovechki, Kratko-zpravek evangeliumov nedeljneh i svetechneh, Vu Peshti. 1820.)
Nema komentara:
Objavi komentar
Upute za komentiranje
Kako bi se razlikovali sugovornici, obavezno koristite neko ime ili nadimak koji možete dodati i na kraju komentara. Potpuno anonimni komentari najčešće se brišu.
Nijedan komentar objavljen na ovom blogu ne podrazumijeva ni u kojem stupnju prihvaćanje od autorâ ovog bloga mišljenja koja su u komentaru izražena.